Concurso de tangram

Este quebracabezas chinés forma parte dos xogos da nosa aula desde fai tempo, pero non era moi utilzado, así que decidimos facer un concurso a ver quen era o máis rápido formando as figuras.

Aínda que non había premio, tomárono moi en serio! Elexiron eles mesmos o seu rival, concentración, motricidade fina, destreza óculo-manual, intelixencia visual-espacial, lóxico-matemática e a xogar.

Volveron as estacións

Xa facía tempo que non traballabamos por estacións e como estamos rematando o trimestre e os libros, estamos un pouco apurando todo. Quedan follas por rematar no libro e conceptos por repasar, así que misturamos todo con un pouquiño de xogo.

Na estación das matemáticas, despois de traballar no libro a numeración, xogamos o parchís sumando mentalmente, nada de contar de unha en unha. Iso é para covardes!

Na estación das linguas, despois de ler e facer unhas preguntas sobre un poema astronómico, estivemos descubrindo cousas sobre varias temáticas cos libriños Abrementes.

Na estación da biblioteca, despois de facer o repaso á táboa do 4 en grupo (ai, como nos segue custando traballar e poñernos de acordo...) xogamos coas multiplicacións na táboa do 100.

E na estación das ciencias, despois de traballar un pouco no libro de sociais, xogamos a descubrir un animal facendo preguntas ás que só podiamos contestar si ou non.

Cumprecontos de Anas

O cumpre de Anas foi o xoves 14 pero por unhas cousas ou por outras, non puidemos ler o conto así que tróuxoo hoxe.

Parabéns, Anas!

Cumprecontos de Claudia

Claudia non quixo agardar ao seu cumple (o 17 de marzo) e tróuxonos un libro para lernos a todos.

Parabéns, Claudia!

Novo concepto

Hoxe comezamos cos corpos xeométricos e para facelo un pouco máis vivencial cada grupo tivo que montar oito.

Catro pirámides: con base triangular, cuadrangular, pentagonal e o tetraedro.

Catro prismas: con base triangular, cuadrangular, pentagonal e o hexaedro.

Montalos non é tarefa fácil. Hai que ter moita paciencia, perseverancia, curiosidade... Houbo grandes resultados para ser a primeira vez que traballan con este tipo de material, que, repito, non é nada doado.

Despois xogamos un pouco con eles e puxemos a proba a memoria a curto prazo.

Festa do Entroido 2019

Subimos correndo do recreo para vestir os disfraces.

Despois baixamos á pista de baloncesto para ver as actuacións das outras clases.

E por fin chegou o momento de cantar a canción de Pablo Díaz "Rock do porco celta" cos nosos compañeiros de 2ºA.

Creando nubes

E por fin esta semana fixo sol e conseguimos crear un montón de nubes. Estamos un pouco disfrazados porque a visita foi despois dun ensaio 😜

Pola tarde a pleno sol, tamén choveu bastante.

Diploma de multiplicar

Xa estamos en tempo de aprender as táboas de multiplicar así que aquí vos deixo un xogo para practicalo todo ben. Elexide as táboas que traballamos (0, 1, 2, 3, 5 e 10).

Unha vez vexades que non tedes erros, podedes atrevervos a sacar o diploma de multiplicador neste outro enlace.